ಹರಿದೆಸೆದಿದ್ದೇನೆ ಈ ತುಣುಕು ಚರ್ಮವನ್ನ
ಸದ್ದಡಗಿಸಿದ ಈ ಉಸಿರು ಹಾಗೆ ಇದೆ
ಶಬ್ಧಗಳೆಲ್ಲ ಹಾರಾಡುತ್ತಿವೆ ಹಕ್ಕಿಗಳಂತೆ
ಹುಟ್ಟು ಸಾವಿನ ನೆರಳಲ್ಲಿ
ಗುದುಮುರುಗಿ ಗೀತ ಸಾಗುತ್ತಿದೆ
ಯಾವುದೇ ಅಡೆತಡೆಯಿಲ್ಲದೇ
ಹರಿದೆಸೆದಿದ್ದೇನೆ ಈ ತುಣುಕು ಚರ್ಮವನ್ನ
ಬಟ್ಟೆಗಳೆಲ್ಲ ಶಾಪದ ಮೂಟೆ ಹೊತ್ತಿವೆ
ಪಾದಗಳೊ ಬಿರುಕುಗಳ ಕಾಳಗದಲ್ಲಿ ನರಳುತ್ತಿವೆ
ಕಾಲ್ಮರಿಯ ಚೀಮಾರಿಗೊ
ಬೂಟಿನೇಟಿಗೊ
ಒಂಟೆಸಳ ಬಳ್ಳೊಳ್ಳಿ ಬಿಕ್ಕುತ್ತಿದೆ
ಸಂತೆ ಸಂತೆಗೊ ಅದೆಷ್ಟು ಅಂತರ
ಹರಿದೆಸೆದಿದ್ದೇನೆ ಈ ತುಣುಕು ಚರ್ಮವನ್ನ
ನಿರಾಳ ಮೂಖಗಳ ಹಸಿವು ನೀಗಲೆಂದು
ತಾಪತ್ರಯದ ಚಂದಿರನನ್ನು ಹೂತು
ಮಣ್ಣ ಮೌನವ ಧರಿಸಿದ ಕೆರೆಯ ಒಡಲ ಕರೆಗೆ ಓಗೊಟ್ಟು
ಹರಿದೆಸೆದಿದ್ದೇನೆ ಈ ತುಣುಕು ಚರ್ಮವನ್ನ
ಯಾವ ಹಾದಿಯ ಸುಣ್ಣ ಬಣ್ಣ ಅಪ್ಪಿಕೊಳ್ಳುವುದೆಂದು
ಕಾತರದ ನೀಲಗಿರಿಯ ಕೊರಳು ಚಾಚುವುದೆಂದು
ಮಟ ಮಟ ಮಧ್ಯಾಹ್ನದ ನೆತ್ತಿ ಅರಳುವುದೆಂದು
ಮಾತಿಲ್ಲದೆ ಎದೆಗುಂಟ ಹಬ್ಬಿರೊ ಗೋರಿಗಳ ಹೂವಿನ ನಿರಾಳತೆಗೆ ಶರಣಾಗಿ
