ಒಲವಾಗಿಯೇ ಉಳಿದು ಬಿಡೋಣ
ನೀಲ್ಬಾನು ಮತ್ತು ಹಕ್ಕಿಗಳಂತೆ
ಬುವಿಯೊಡಲಿಗೆ ತಂಪೆರೆವ ವೃಷ್ಟಿಯಂತೆ
ಭಾನ್ಕಿರಣಕೆ ಮುಗುಳ್ನಗುವ ಕಮಲೆಯಂತೆ
ಒಲವಾಗಿಯೇ ಉಳಿದು ಬಿಡೋಣ
ಸಂಬಂಧವೆಂಬ ಬೇಲಿಯ ಹೊರತಾಗಿ
ಸಮಾಜದ ಕಟ್ಟುಕಟ್ಟಳೆಗಳಿಂದ ಪಾರಾಗಿ
ಹೃದಯಗಳ ಸೌಖ್ಯದ ಪರವಾಗಿ
ಒಲವಾಗಿಯೇ ಉಳಿದು ಬಿಡೋಣ
ಯಮುನೆಯ ಮಡಿಲಿನ ರಾಧಾ-ಶ್ಯಾಮರಂತೆ
ಚಂದಿರನು ಸುರಿಸುವ ಬೆಳದಿಂಗಳಂತೆ
ತಂಬೂರಿಗೆ ಜೀವತುಂಬಿದ ಮೀರಾ-ಮಾಧವರಂತೆ
ಒಲವಾಗಿಯೇ ಉಳಿದು ಬಿಡೋಣ
ಹೃದಯಗಳ ಮೌನಕ್ಕೆ ಕಿವಿಯಾಗೋಣ
ಭಾವನೆಗಳ ಹರಿವಲ್ಲೇ ಕರಗಿಬಿಡೋಣ
ಹ್ಞಂ ಒಲವಾಗಿಯೇ ಉಳಿದುಬಿಡೋಣ
