ಕಳೆದದ್ದು ಕಳೆದ್ಹೋಯ್ತು ಬಿಟ್ಟು ಬಿಡು
ನೆನಪುಗಳ ಗೋರಿ ಮೇಲೆ ನಿರ್ಮಿಸು
ಹೊಚ್ಚ ಹೊಸ ಇತಿಹಾಸ ನವಪೀಳಿಗೆಗೆ
ಏಕೆಂದರೆ ಕಳೆದದ್ದು ನಮ್ಮದಲ್ಲ;
ನಾಳೆಗಳು ನಮ್ಮವು!
ಇಲ್ಲದ್ದರ ಬಗ್ಗೆ ಚಿಂತೆ ಬಿಟ್ಟು ಬಿಡು
ವರ್ತಮಾನದ ಇರುವಿಕೆಯ ಒಟ್ಟುಗೂಡಿಸು
ಅವಕೃಪೆಗಳ ಮೀರಿ ಬೆಳೆದು ನಿನ್ನತನಕೆ
ನವಶಕ್ತಿ ಗಳಿಸು ಈ ದಿನ;ಆಗ
ನಾಳೆಗಳು ನಮ್ಮವು!
ಸುಟ್ಟುಬಿಡು ಕರಕಲಾದ ಕಾರಣಗಳು
ಅವು ನಿನ್ನವಲ್ಲವೆಂದ ಮೇಲೆ ಅಳಿಸು
ಕಳೆಗುಂದಿದ ಅವಕೆ ಹೊಸ ರಂಗು ನೀಡಿ
ನವರೂಪ ನೀಡು ಇಂದು; ಆಗ
ನಾಳೆಗಳು ನಮ್ಮವು!
ದಕ್ಕಿಸಿಕೊಂಡು ನಡೆ ಕಷ್ಟ, ಕಹಿಸತ್ಯಗಳ
ಅನುಭವಗಳು ನಾಳೆಗೆ ಸೋಪಾನವೆಂದು
ಜಗದ ಭೀತಿಗೆ ತೆರೆಯೆಳೆದು,ಸಡ್ಡೊಡೆ ಸಾಧನೆಗೆ
ದೃಢ ನಿರ್ಧಾರ ಮಾಡಿಂದು; ಆಗ
ನಾಳೆಗಳು ನಮ್ಮವು!
ತ್ಯಜಿಸಿಬಿಡು ವಿಚಾರಹೀನ ಕ್ಷುಲಕಗಳ
ಪರರ ಮನೆ ಸಾಯಿಸುವ ಅವ ನೀ ಸಾಯಿಸು
ಬಣ್ಣದೊಳಗಿನ ಬದುಕ ನೀ ಬದಲಾಯಿಸು
ಬದುಕೇ ಬಣ್ಣವಾಗುವಂತೆ ಇಂದು; ಆಗ
ನಾಳೆಗಳು ನಮ್ಮವು!
