ವಿದ್ಯಾ ಗಾಯತ್ರಿ ಜೋಶಿ ಅವರು ಬರೆದ ಕವಿತೆ ‘ನಿಗೂಢ ಸುಂದರಿ’

ಅವಳು ಸುಂದರಿ…
ಬಳುಕುವ ವಯ್ಯಾರಿ
ಕಣ್ಣ ನೋಟದಲ್ಲೇ
ಕೊಂದು ಬಿಡುವಳಲ್ಲೆ?

ಬಾರಿ ಬಾರಿ ಸತ್ತು
ಮತ್ತೆ ಚೇತರಿಸಿ ಎದ್ದು
ಅವಳಲ್ಲಿ ಯಾಚಿಸುವೆ
ಪ್ರೇಮಭಿಕ್ಷೆಯ ಮದ್ದು

ಅದೇ ತೀಕ್ಷ್ಣ ನೋಟ
ಕಣ್ಣ ಭರ್ಜಿಯಿಂದ
ಎದೆಯ ತಿವಿಯುವ
ಕಠೋರ ಆಟ

ಮಂದಹಾಸವಿಲ್ಲ
ಮುಗುಳ್ನಗೆಯ ಸುಳಿವಿಲ್ಲ
ನಡೆಯೆಲ್ಲಾ ಒಗಟು
ಬಿಡಿಸಲಾಗದ ಕಗ್ಗಂಟು

ನಾ ಮನಸೋತೆನೆ
ಮಯಾಂಗನೆಗೆ?
ನನ್ನನ್ನೇ ನಾ ಪರೀಕ್ಷಿಸಿಕೊಳ್ಳುವ ಪರಿ
ಅವಳ ಗಮನಕ್ಕೆ ಬಾರದೆ?

ಅವಳ ಪ್ರತಿ ನಡೆ ನುಡಿ
ನಿಗೂಢ
ಹೆಣ್ಣಿನ ಹೆಜ್ಜೆ ನಡೆ ನುಡಿ
ನಿಗೂಢ!