ಮನೆಯ ಕರೆಗಂಟೆಯ ಸದ್ದಾದಾಗ ಅಡುಗೆ ಮನೆಯಲ್ಲಿದ್ದ ಜನನಿ, ಬೆಳಿಗ್ಗೆ ಬೆಳಿಗ್ಗೆ ಯಾರು ? ಬಂದಿರಬಹುದು! ಎಂದು ಯೋಚಿಸುತ್ತಾ! ಹೊರಗಡೆ ಬಂದು ಬಾಗಿಲು ತೆಗೆದರು. ಎದುರುಗಡೆ ಇರುವ ವ್ಯಕ್ತಿಯ ಮುಖ ನೋಡಿ ಖುಷಿಯಿಂದ ‘ಅಪ್ಪುಗೆ’ ನೀಡಬೇಕು ಎಂದು ಒಂದು ಹೆಜ್ಜೆ ಮುಂದಿಟ್ಟವರು ಹಾಗೆಯೇ ಹಿಂದಕ್ಕಿಟ್ಟರು. ಅದಕ್ಕೆ ಕಾರಣವೆನೆಂದರೆ ಎದುರುಗಡೆ ಇರುವ ಮುದ್ದಿನ ಮಗನ ಜೊತೆ ‘ಅಪರಿಚಿತ’ ಹುಡುಗಿ , ಅಲ್ಲ….ಅಲ್ಲ….ಅದು ..ಅದು.. ಮದುವೆಯಾಗಿರುವ ಹೆಣ್ಮಗಳು.
“ಜನನಿಯವರಿಗೆ, ತಮ್ಮ ಕಣ್ಣನ್ನೆ ತಾವು ನಂಬಲಾಗಲಿಲ್ಲ. ‘ಅಗಸ್ತ್ಯ’ ಅಮ್ಮನ ಮನಸ್ಸನ್ನು ಓದಿದವನಂತೆ ಮುಂದೆ ಬಂದು ಅಮ್ಮಾ! ಇವಳು ‘ಹಾಸಿನಿ’ ನನ್ನ ಗೆಳೆಯ ‘ಪ್ರದೀಪ್’ನ ತಂಗಿ ನಿನ್ನೆ ಇವಳ ಮದುವೆಯೆಂದು ಪ್ರದೀಪ್ ಒಂದು ತಿಂಗಳ ಮುಂಚೆ ನನಗೆ ಆಮಂತ್ರಣ ಪತ್ರಿಕೆ ಕಳುಹಿಸಿದ್ದ. ಮದುವೆಯ ಮುಹೂರ್ತಕ್ಕೆ ಸರಿಯಾಗಿ ವರನು ಕೈ ಕೊಟ್ಟ ಕಾರಣ ಗೆಳೆಯನ ಮರ್ಯಾದಿಗಾಗಿ ಅನಿವಾರ್ಯ ಪರಿಸ್ಥಿತಿಯಲ್ಲಿ ಇವಳ ಕೈ ಹಿಡಿದೆ.
ಮಗನ ಮಾತುಗಳ ಕೇಳಿಸಿಕೊಂಡ ಜನನಿ ಒಮ್ಮೆ! ಹಾಸಿನಿಯ ಮುಖ ನೋಡಿದಳು. ಅವರ ಕೋಪಗೊಂಡ ನೋಟ ಎದುರಿಸಲಾಗದೆ ಹಾಸಿನಿ ತಲೆ ತಗ್ಗಿಸಿದಳು. ಅಗಸ್ತ್ಯ ನಿನಗೆ ನಮ್ಮ ತುಂಬು ಕುಟುಂಬದ ಯಾರೊಬ್ಬರೂ ನೆನಪಾಗಲಿಲ್ಲವ??. ನೀನು ಸ್ನೇಹ ಅಮರ ಎಂದು ಗೆಳೆಯನಿಗಾಗಿ ಮದುವೆಯಾದೆ. ಆದರೆ ನಾನು ಇವಳನ್ನು ಸೊಸೆಯಾಗಿ ಎಂದು ಸ್ವೀಕರಿಸಲಾರೆ. ನಿನ್ನ ಮದುವೆಯ ಕನಸು ಕಂಡ ನಮ್ಮ ಕನಸನ್ನೆಲ್ಲಾ ನುಚ್ಚು ನೂರು ಮಾಡಿರುವೆ ನೀನು. ಛೇ.. ಎಂದು ಒಳ ನಡೆದರು ಜನನಿ”.
ಹೊಸ ಜೋಡಿಗೆ ಅಲ್ಲಿ ಆರತಿಮಾಡಿ , ಸೇರೊದ್ದು ಒಳಗೆ ಕರೆಸಿಕೊಳ್ಳಲು ಯಾರು ಇರಲಿಲ್ಲ. ಬೆಳಗಿನ ಸಮಯವಾದ್ದರಿಂದ ರಾಯರ ತುಂಬು ಕುಟುಂಬ ಸಿಹಿ ನಿದ್ರೆಯಲ್ಲಿತ್ತು. ಹಾಸನದಿಂದ ಬೆಂಗಳೂರಿಗೆ ಪ್ರಯಾಣ ಮಾಡಿದ ಹೊಸ ಜೋಡಿಗೆ ಸ್ವಾಗತ ಕೋರಲು ಎಲ್ಲರು ಇದ್ದರು ಯಾರು ಇಲ್ಲದಂತಾಯಿತು.
ಹಾಸಿನಿ ಒಳಗೆ ಬಾ ಎಂದು ಅಗಸ್ತ್ಯ ಮನೆಯೊಳಗೆ ಕಾಲಿಟ್ಟ. ಪತಿಯನ್ನನುಸರಿಸಿ ಒಳ ನಡೆದಳು ಹಾಸಿನಿ. ಮನೆಯ ಸದಸ್ಯರು ಎದ್ದು ಅಡುಗೆ ಮನೆಗೆ ಬರಲು ಒಬ್ಬರ ಬಾಯಿಯಿಂದ ಒಬ್ಬರಿಗೆ ವಿಷಯ ತಿಳಿದು ಹಾಲ್ ನಲ್ಲಿ ಕುಳಿತ ಹಾಸಿನಿಯ ಮೇಲೆ ಮನೆಯವರ ಕಣ್ಣು ಬಿತ್ತು. ‘ಜನನಿಯವರ ಹೊರತು ಪಡಿಸಿ ರಾಯರ ಕುಟುಂಬ ಹಾಸಿನಿಯನ್ನು ಸೊಸೆಯೆಂದು ಸ್ವೀಕರಿಸಿತು’
ನನ್ನ ಕೈ ಹಿಡಿದು ನನಗೊಂದು ಜೀವನ ಕೊಟ್ಟ ನಿಮಗೆ ಋಣಿ ನಾನು. ಆದರೆ ನನ್ನಿಂದ ತಾಯಿ ಮಗನ ಬಾಂಧವ್ಯ ಹಾಳಗದಿರಲಿ. ನಿಮ್ಮ ತಾಯಿ ನಿಮ್ಮ ಕ್ಷಮಿಸಲಿ ಎಂದು ಹಾಸಿನಿ ನಿಟ್ಟುಸಿರು ಬಿಟ್ಟಳು. ಗೆಳೆಯನ ಪರಿಸ್ಥಿತಿ ಕಂಡು ಮರುಗಿ ನಿಮ್ಮ ಕೈ ಹಿಡಿದೆ. ಆದರೆ ಒಬ್ಬರಿಗೊಬ್ಬರು ಅರ್ಥವಾಗುವವರೆಗೆ ದೂರವೆ ಇರುವ ಎನ್ನುವ ಅಗಸ್ತ್ಯನ ಮಾತಿಗೆ ಒಪ್ಪಿದಳು.
“ಹಾಸಿನಿಯು ಮಾಡುವ ಊಟ, ತಿಂಡಿ ಯಾವುದೇ ಅಡುಗೆಯನ್ನು ಬಳಸದೆ ಸ್ವತಃ ತಾವೇ ಅಡುಗೆ ಸಿದ್ದಪಡಿಸಿಕೊಂಡು ತಿನ್ನುತ್ತಿದ್ದರು ಜನನಿ”. ದಿನಗಳೆದಂತೆ ಹಾಸಿನಿಯ ಒಳ್ಳೆಯತನ ಅಗಸ್ತ್ಯನ ಮನಸ್ಸು ಬದಲಾಯಿಸಿತು. ಹಾಸಿನಿ ಮತ್ತು ಅಗಸ್ತ್ಯನ ಸಂಸಾರ ಆರಂಭವಾಯಿತು.
“ಮದುವೆಯಾಗಿ ಒಂದೆರಡು ತಿಂಗಳು ಕಳೆದ ನಂತರ ಹಾಸಿನಿಯ ದೇಹದಲ್ಲಿನ ಬದಲಾವಣೆ ಅವಳ ಗಮನಕ್ಕೆ ಬಂದು ಪರೀಕ್ಷಿಸಿಕೊಂಡಾಗ ಕಣ್ಣಿಗೆ ಕಾಣಿಸಿದ ಎರಡು ಗುಲಾಬಿ ಬಣ್ಣದ ರೇಖೆಗಳು ಅವಳ ಖುಷಿಯನ್ನು ಉತ್ತುಂಗಕ್ಕೇರಿಸಿತು. ಅಗಸ್ತ್ಯ ಕೆಲಸ ಮುಗಿಸಿ ಬಂದಾಗ ಹಾಸಿನಿಯ ಮಾತು ಕೇಳಿ ಆತನಿಗಿದ್ದ ಕೆಲಸದ ಒತ್ತಡ, ಆಯಾಸ ಎರಡು ಮಾಯವಾಯಿತು. ಅತ್ತೆಗೆ ವಿಷಯವ ತಿಳಿಸಬೇಕೆಂದು ಹಾಸಿನಿ ಅಡುಗೆ ಮನೆಗೆ ಬಂದಾಗ, ಸಂಜೆಯ ಕಾಫಿಯ ತಯಾರಿಯಲ್ಲಿದ್ದರು ಜನನಿ. ಅತ್ತೆ!…. ಅತ್ತೆ… ಎಂದು ಎರಡು ಮೂರು ಬಾರಿ ಕರೆದರು ಜನನಿ ಕೇಳಿಸಿದರು ಕೇಳಿಸಿಕೊಳ್ಳದವರಂತೆ ತಮ್ಮ ಕೆಲಸದಲ್ಲಿ ನಿರತರಾಗಿದ್ದರು. ಒಂದೆರಡು ಹೆಜ್ಜೆ ಮುಂದೆ ಹೋದ ಹಾಸಿನಿ ಅತ್ತೆ ನಿಮ್ಮ ಮೊ… ಎಂದು ಜನನಿಯವರ ಕೈ ಹಿಡಿದು ಹೇಳುವಾಗ ಮುಂದೆ ಅವಳಿಗೆ ಮಾತನಾಡಲು ಅವಕಾಶ ಕೊಡದಂತೆ , ಅವಳು ಹೇಳಿದನ್ನು ಕೇಳಿಸಿಕೊಳ್ಳುವ ತಾಳ್ಮೆ ಇರದೆ ನನ್ನ ಕೈ ಮುಟ್ಟಿ ಮಾತನಾಡುವಷ್ಟು ಧೈರ್ಯ ಬಂತ ನಿನಗೆ?? ಹೋಗಾಚೆ ಎಂದು ಮುಂದಾಗುವ ಅನಾಹುತದ ಅರಿವಿರದೆ ಅವಳನ್ನು ದೂಡಿದರು. ದೂಡಿದ ರಭಸಕ್ಕೆ ಅಡುಗೆ ಮನೆಯ ಕಟ್ಟೆಗೆ ಹೊಟ್ಟೆ ಬಡಿದು ಅಮ್ಮಾ! ಎನ್ನುತ್ತಾ ಹಾಸಿನಿ ಅಲ್ಲಿಯೇ ಕುಸಿದಳು”.
ಹಾಸಿನಿಯ ಧ್ವನಿಯ ಕೇಳಿ ಮನೆಯವರು ಅಡುಗೆ ಮನೆಯಲ್ಲಿ ಉಪಸ್ಥಿತರಾದರು. ಅಗಸ್ತ್ಯನು ಓಡಿ ಬಂದು ಹಾಸಿನಿಯ ಎತ್ತುಕೊಂಡು ಕಾರಿನಲ್ಲಿ ಕುರಿಸಿ ಆಸ್ಪತ್ರೆಗೆ ನಡೆದನು. ಹಾಸಿನಿಯ ಪರೀಕ್ಷಿಸಿದ ಡಾಕ್ಟರ್ ಅವಳ ಹೊಟ್ಟೆಗೆ ಪೆಟ್ಟು ಬಿದ್ದಿರುವುದರಿಂದ ಗರ್ಭಪಾತವಾಗಿದೆ. ಮಗುವನ್ನು ಉಳಿಸಲಾಗುವುದಿಲ್ಲವೆಂದರು. ಸ್ವಲ್ಪ ಹೊತ್ತಿನ ಹಿಂದೆ ಇರುವ ಖುಷಿ ಅಗಸ್ತ್ಯನ ಮುಖದಿಂದ ದೂರವಾಗಿ ಚಿಂತೆಯ ಗೆರೆಗಳು ಮೂಡ ತೊಡಗಿದವು.
ಮನೆಯವರಿಗೆ ವಿಷಯ ಗೊತ್ತಾದಾಗ, ರಘು ರಾಯರು ಜನನಿಯವರ ಕೆನ್ನೆಗೆ ಬಾರಿಸಿದ್ದರು.
ಸೊಸೆಯನ್ನು ದ್ವೇಷಿಸಿದೆ ನಿಜ. ಅದರೆ ಅವಳು ಈಗ ಇರುವ ಪರಿಸ್ಥಿತಿ ತಿಳಿಯದೆ ಒಂದು ಜೀವ ಕೊಂದೆನಲ್ಲ. ಈ ‘ಪಾಪಿ ಕೈಯಿಂದ ಮುಗ್ಧ ಜೀವ ಬಲಿಯಾಗಿತಲ್ಲ ಎಂದು ಕಣ್ಣೀರು ಸುರಿಸಿದರು’. ಇವರ ಪಶ್ಚಾತ್ತಾಪದ ಕಣ್ಣೀರು ಮನೆಯವರಿಗೆ ನಾಟಕ ಎನಿಸಿ ಜನನಿಯವರನ್ನು ಸಮಾಧಾನ ಮಾಡದೆ ಎಲ್ಲರೂ ತಮ್ಮ ತಮ್ಮ ರೂಮು ಸೇರಿದರು.
ಮನೆಗೆ ಬಂದ ಅಗಸ್ತ್ಯನು ತಾಯಿ ಹತ್ತಿರ ಮಾತನಾಡುವುದನ್ನೇ ಕಡಿಮೆ ಮಾಡಿದನು. ನಾನು ಕ್ಷಮಿಸಲಾರದ ತಪ್ಪು ಮಾಡಿರುವೆ ಎಂದು ಜನನಿಯವರು ಕೊರಗುತ್ತಿದ್ದರು. ಹಾಸಿನಿಯ ಮುಂದೆ ಕ್ಷಮೆಯಾಚಿಸಿದರು. ಆದರೆ ಮಗನಿಂದ ಇವರ ಕ್ಷಮೆಗೆ ಬೆಲೆ ಸಿಗಲಿಲ್ಲ. ಒಂದು ದಿನ ಸ್ನಾನ ಮಾಡುವಾಗ ಬಚ್ಚಲಮನೆಯಲ್ಲಿ ಜಾರಿ ಬಿದ್ದು ಕಾಲು ಮುರಿದುಕೊಂಡ ಜನನಿಯವರ ಸೇವೆಗೆ ನಿಂತವಳು ಮಾತ್ರ ಹಾಸಿನಿ. “ಸ್ವಲ್ಪವೂ ಹೇಸಿಗೆ ಇಲ್ಲದೆ ಜನನಿಯವರ ಸೇವೆ ಮಾಡಿದ ಹಾಸಿನಿಯ ಮೇಲೆ ಜನನಿಗೆ ಅಭಿಮಾನವುಕ್ಕಿತು. ಸ್ವತಃ ತಮ್ಮ ಮೇಲೆಯೇ ತಮಗೆ ಹೇಸಿಗೆಯಾಯಿತು”.
ಕೆಲ ತಿಂಗಳುಗಳು ಕಳೆದ ನಂತರ ಹಾಸಿನಿಯು ಮತ್ತೊಮ್ಮೆ! ಕೊಟ್ಟ “ಸಿಹಿ ಸುದ್ಧಿಯಿಂದ ಮನೆಯ ವಾತಾವರಣ ಬದಲಾಯಿತು”. ಜನನಿಯವರೆ ತಾಯಿಯಂತೆ ಹಾಸಿನಿಯ ನೋಡಿಕೊಂಡರು. ದಿನ ಕಳೆದಂತೆ ಇಬ್ಬರ ನಡುವಿನ ಬಾಂಧವ್ಯ ಹೆಚ್ಚಿ ಅತ್ತೆ-ಸೊಸೆ ಅಮ್ಮ ಮಗಳಂತಾದರು. ಅತ್ತೆ-ಸೊಸೆಯ ಹೊಂದಾಣಿಕೆಯ ಗುಣದೊಂದಿಗೆ ಸಂಸಾರ ಜಗಳವಿಲ್ಲದೆ ಮುನ್ನಡೆಯಿತು.
ಸುವರ್ಣಾ ಭಟ್ಟ
ಶಿರಸಿ ತಾಲ್ಲೂಕು
ಉತ್ತರ ಕನ್ನಡ
